សៀមរាប៖ រយៈពេល១២ខែ ក្នុងឆ្នាំ២០២៣ ចំនួនភ្ញៀវទេសចរបរទេសបានទិញបណ្ណ ចូលទស្សនារមណីយដ្ឋានអង្គរមានជាង៨០ម៉ឺននាក់ ទទួលបានចំណូលជាង ៣៧លានដុល្លារ កើនឡើងជាង២០០ភាគរយបើធៀបនឹងឆ្នាំ២០២២។

យោងតាមរបាយការណ៍របស់គ្រឹះស្ថានអង្គរ នាថ្ងៃទី២ ខែមករា ឆ្នាំ២០២៤ បានឱ្យដឹងថា ភ្ញៀវទេសចរបរទេស បានទិញបណ្ណ ចូលទស្សនារមណីយដ្ឋានអង្គរ មានចំនួន ៧៩៨ ០៦៩នាក់ ខណៈចំណូលដែលប្រមូលបានពីការលក់សំបុត្របានចំនួន ៣៧ ១៩៨ ៩៨៨ដុល្លារអាម៉េរិក បើធៀបរយៈពេលដូចគ្នាក្នុងឆ្នាំ២០២២ មានការកើនឡើង ២២២,៦៨ ភាគរយ។

ដោយឡែក ក្នុងខែធ្នូ ឆ្នាំ២០២៣ ចំនួនភ្ញៀវទេសចរបរទេស ដែលបានទិញបណ្ណចូលទស្សនារមណីយដ្ឋានអង្គរមានចំនួន ៩៨ ០៧៣ នាក់ ដោយទទួលបានចំណូលចំនួន ៤ ៦៥២ ១៤១ ដុល្លារ។

ទន្ទឹមនោះ ការលក់បណ្ណនៅប្រាសាទកោះកែរ សម្រាប់ខែធ្នូ ឆ្នាំ២០២៣ទទួលបានភ្ញៀវទេសចរបរទេសចំនួន ២ ៥២៦នាក់ រកចំណូលបាន ៣៧ ៨៩០ដុល្លារ ខណៈ សរុបចំណូលលក់បណ្ណនៅប្រាសាទកោះកែរ រយៈពេល ១២ខែ ក្នុងឆ្នាំ២០២៣ មានចំនួន ១៤ ៨០៦នាក់ ទទួលបានចំណូល ២២២ ០៩០ដុល្លារ។

ជាមួយគ្នានេះ ចំណូលពីការលក់សំបុត្រទូក ខែធ្នូ មានចំនួន ៦៣ ៦៣៨ ដុល្លារ។ សរុបចំណូលលក់សំបុត្រទូក រយៈពេល១២ខែ ក្នុងឆ្នាំ២០២៣ មានចំនួន៥៦៤ ៦៧១ដុល្លារ។

គួរឱ្យដឹងដែរថា ថ្ងៃឆ្លងឆ្នាំសកល២០២៤ ខេត្តសៀមរាប ទទួលបានភ្ញៀវទេសចរជាតិ និងអន្តរជាតិសរុប ៣០៤ ០៦៤នាក់ ក្នុងនោះភ្ញៀវទេសចរជាតិ និងប្រជាពលរដ្ឋក្នុងខេត្ត មានចំនួនប្រមាណ ២៩៥ ០០០ នាក់ និងភ្ញៀវទេសចរអន្តរជាតិ មានចំនួន ៩ ០៦៤ នាក់៕